बेलायती युनिभर्सिटीमा सयवर्षदेखि हुँदै आएको नेपाली भाषाको पढाइ बन्द

बेलायतस्थित एक विश्वविद्यालयमा एकसय वर्षदेखि हुँदै आएको नेपाली भाषाको पढाइ स्थगित भएको छ । स्कुल अफ ओरिएन्टल स्टडिजमा नेपाली भाषा पढाउँदै आएका प्राध्यापक माइकल हटले अवकास लिएपछि पढाइ रोकिएको हो ।

उक्त विश्वविद्यालयमा लामो समयदेखि नेपाली भाषाको प्रवद्र्धनमा प्राध्यापक हट सक्रिय थिए । दुई महिनाअघि उनले अवकास लिएका हुन् । सोही युनिभर्सिटीमा नेपाली भाषाको विद्यार्थी र प्राध्यापकको रुपमा उनले चार दशक बिताएका थिए ।

जनशक्तिको अभावमा नेपाली भाषाको पढाइ रोक्नुपरेको सोआस् युनिभर्सिटीले जनाएको छ । युनिभर्सिटीको वेबसाइटमा जनशक्ति नहुँदा पढाइ रोक्नुपरेको उल्लेख छ । स्रोतका अनुसार झन्डै सयवर्षदेखि उक्त विश्वविद्यालयमा नेपाली भाषाको पढाइ हुँदै आएको थियो ।