माओवादीले श्रम शिविरमा लगेका बालबालिकामाथि फिल्म बनाउँदै ‘अवतार’ अभिनेता

न्यूयोर्क टाइम्सको बेस्ट सेलिङ पुस्तक ‘लिटल प्रिन्सेस’माथि फिल्म निर्माण हुने भएको छ । हलिउडको ब्लकबस्टर फिल्म ‘अवतार’ अभिनेता जोएल डेभिड मुर्रेले स्थापना गरेको बाल्कोनी नाइन प्रोडक्सनले फिल्म निर्माण गर्ने भएको हो ।

नेपाली सडक बालबालिकाको अवस्था चित्रण गरिएको उक्त पुस्तकमाथि फिल्म एडप्टेसन हुने भएको छ । यो पुस्तकले नेपाली सडक बालबालिकालाई आश्रय दिन एक मान्छेले गरेको संघर्ष चित्रण गर्छ । ऐतिहासिक ड्रामा ‘द म्यान हु न्यू इन्फिनिटी’ लेखक एवं निर्देशक म्याट ब्राउनले फिल्म निर्देशन गर्नेछन् ।

कोनोर ग्रेनन लिखित उक्त पुस्तकले न्यूयोर्क टाइम्समा सर्वाधिक विक्री हुने पुस्तकको रेकर्ड राखेको थियो । ग्रेनन सगरमाथा हाइकिङमा नेपाल आएको बेला उनले सडकमा भेटेका बालबालिकालाई आश्रय दिएको कथा यसमा छ । हलिउड रिपोर्टरले ती बालबालिकालाई तत्कालिन विद्रोही माओवादीले श्रम शिविरमा जबर्जस्ती लगेको लेखेको छ ।

ग्रेनन ती बालबालिकालाई पुनः खोज्दै काठमाडौं आएको कथा यसमा छ । बाल्कोनी पिक्चर्सले फिल्म निर्माणका लागि हार्बिङ्गर पिक्चर्स र नेटी बर्कससँग सहकार्य गर्दैछ । यी कम्पनीहरुले अस्कर विजेता फिल्म ‘द हेल्प’ पनि निर्माण गरेका थिए ।