फौजदारी अभियोगमा कारागारमा रहेका अभिभावकका सन्तानलाई अभिभावकत्व दिने संस्था हो बन्दी सहायता नियोग(पाम) । त्यस्ता बालबालिकाहरूको उद्धार गरी उनीहरूको शिक्षा र पालनपोषणमा पामको महत्वपूर्ण योगदान छ । काठमाडौंको नागार्जुन नगरपालिका रानीवनमा रहेको पामले त्यहाँ भएका बालबालिकालाई जुडो तालिम दिने र अब्बल खेलाडीको रुपमा समेत स्थापित गर्ने गरेको छ । पाममा हुर्किएकी १८ वर्षीय देवकीमाया श्रेष्ठ सिन्धुल्चोककी हुन् । बुबा जेलमा पर्दा उनी सानै थिइन् । बुबा जेल परेको सुरुका दिनमा आफ्ना भाइबहिनी सहित देवकीमाया ममीसँग बस्दै आइन् । तर, अचानक ममीले छाडेर हिंडेपछि उनीहरूको बिचल्ली भयो । त्यसपछि उनी पाममा पुगिन् र त्यहीँ हुर्किइन्।
साहित्यकार पारिजातको पहलमा सन् १९९१ मा पामको स्थापना भएकाे हाे । स्थापनाको तीन दशकसम्म आइपुग्दा संस्थाले ५०० भन्दा बढी बालबालिकाको उद्धार गरिसकेको छ । संस्थाका अध्यक्ष नारायणकाजी श्रेष्ठका अनुसार हाल पाममा ३५ जना बालबालिका रहेका छन् ।
