अमेरिकामा गम्भीर साइबर आक्रमणको चेतावनी

एजेन्सी । अमेरिकी अधिकारीहरुले यो साता देशमा गम्भीर प्रकृतिको साइबर आक्रमण हुन सक्ने चेतावनी दिएका छन् । मुख्य गरी सरकार, संवेदनशील संरचना र निजी क्षेत्र हमलाको खतरामा छन् ।

साइबर आक्रमणको माध्यमबाट अमेरिकी वित्त र वाणिज्य मन्त्रालयलाई निशाना बनाइएको छ । अमेरिकाको साइबर सेक्युरिटी एन्ड इन्फ्रास्ट्रक्चर सेक्युरीटी एजेन्सी (सीआईएसए)ले भनेको छ कि यो साइबर आक्रमण निकै नै चुनौतिपूर्ण विषय हुन सक्छ ।

अमेरिकाका थुप्रै अधिकारीहरुले शंका गरेका छन् कि यो आक्रमणमा रुसी सरकारको संग्लग्नता छ । तर रुसले यस दावीलाई पूर्णतः खारेज गरिदिएको छ ।

बिहीबार सीआईएसएको विज्ञप्तिमा भनिएको छ, ‘सरकारी निकाय, संवेदनशील परियोजना र निजी क्षेत्र एउटा खतरनाक खेलाडीको माध्यमबाट निशानामा परिरहेको छ जसको सुरुआत सन् २०२० को मार्चमै भएको थियो ।’

नवनिर्वाचित राष्ट्रपति जोय बाइडेनले साइबर सुरक्षालाई आफ्नो प्रशासनले मुख्य प्राथमिकतामा राख्ने बताएका छन् । यो ह्याकिङ अभियानमा अमेरिकाका थुप्रै सरकारी एजेन्सीलाई निशाना बनाइएको छ ।