अध्यादेशविरुद्धको रिटमाथि अर्को शुक्रबार सुनुवाई हुने

काठमाडौं । संवैधानिक परिषद्सम्बन्धी अध्यादेशविरुद्ध परेका तीनवटा रिटमाथिको सुनुवाई सर्वोच्च अदालतको संवैधानिक इजलासमा हुने भनिए पनि आज हेर्न नभ्याइनेमा परेको छ । अब सुनुवाई अर्को शुक्रबार हुनेछ ।

प्रधानन्यायाधीश चोलेन्द्रशमशेर जबराको अध्यक्षतामा बसेको वरिष्ठ न्यायाधीशहरु सम्मिलित इजलासमा तीनवटा रिटमाथि सुनुवाई हुने पेशी तोकिएको थियो । आज ती रिटमाथिको सुनुवाई नहुने भएको सर्वोच्च अदालत स्रोतले जनाएको छ ।

प्रधानन्यायाधीश अध्यक्षताको संवैधानिक इजलासमा सर्वाेच्च अदालतका वरिष्ठ न्यायाधीशहरु दिपक कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठ सदस्य रहेका छन् । इजलासको बैठक हरेक साता बुधवार र शुक्रबार बस्ने गर्छ ।

सरकारले जारी गरेको संवैधानिक परिषद्सम्बन्धी अध्यादेश खारेजीको माग लिएर अधिवक्ता ओमप्रकाश अर्याल, वरिष्ठ अधिवक्ता दिनेश त्रिपाठी र कञ्चनकृष्ण न्यौपानेले अलग अलग रिट दायर गरेका थिए ।