स्वास्थ्य सामग्री खरिदको छानबिन गर्न लेखा समितिले अख्तियारलाई पत्र पठाउने

काठमाडौं । प्रतिनिधि सभाको सार्वजनिक लेखा समितिले स्वास्थ्य सामग्री खरिद नियमसंगत नभएको भन्दै छानबिन गरी कारबाही गर्न अख्तियार दुरुपयोग अनुसन्धान आयोगलाई पत्र पठाउने निर्णय गरेको छ ।

समितिको शुक्रबार सिंहदरबारमा बसेको बैठकले कोभिड १९ रोकथाम तथा नियन्त्रणका लागि गत चैतमा भएको स्वास्थ्य सामग्री खरिद नियमसंगत नभएको ठहर गर्दै छानविन गरी कारबाही गर्न अख्तियारलाई पत्र पठाउने निर्णय गरेको हो ।

बैठकका निर्णय सुनाउँदै समिति सचिव डा. रोजनाथ पाण्डेले अनियमिततामा को को संलग्न हुन् त्यसको छानविन गरि कारवाही गर्न पत्र पठाउने निर्णय भएको बताए । बैठकमा स्वास्थ्य मन्त्री भानुभक्त ढकालसँग पनि समितिले छलफल गरेको थियो ।