मन्त्रीहरुसँग प्रधानमन्त्रीले भनेः प्रचण्डसँगको वार्तामा खास केही भएन

काठमाडौं । प्रधानमन्त्री केपी शर्मा ओलीले पार्टीलाई सहमतिमै फर्काउने प्रयासस्वरुप प्रचण्डसँग गरिएको छलफलमा खास प्रगति नभएको बताएका छन् । खुमलटारमा प्रचण्डलाई एक्लै र वामदेव गौतम सहित भेटेर सीधै मन्त्री निवास पुल्चोक पुगेका ओलीले केहीबेर गृहमन्त्री समेत रहेका सचिवालय सदस्य रामबहादुर थापासँग एक्ला एक्लै छलफल गरेका थिए ।

त्यसपछि स्वास्थ्यमन्त्री भानुभक्त ढकाल, भूमि व्यवस्थामन्त्री पद्मा अर्याल, भौतिक पूर्वाधारमन्त्री वसन्त नेम्वाङ र कानूनमन्त्री डा.शिवमाया तुम्बाहाङ्फे पनि बादल निवासमा पुगेका थिए । मन्त्रीहरुले ‘दुई अध्यक्षबीचको वार्ता कस्तो भयो ?’ भनेर सोध्दा प्रधानमन्त्रीले ‘खास त्यस्तो केही भएन’ भन्ने जवाफ दिएर बालुवाटारतर्फ लागेको भेटमा सहभागी एक मन्त्रीले बताए ।

बादलनिकट स्रोतका अनुसार सरकारमा तत्कालीन माओवादीको तर्फबाट नेतृत्व गरेको नेताको हैसियतले प्रचण्डलाईं सहमतिमा ल्याउन र आरोपपत्र फिर्ता गराउन भूमिका खेल्न ओलीले आग्रह गरेका छन् । बादल तत्कालीन माओवादीमा प्रचण्डभन्दा अलग गुटको नेतृत्व गर्छन् । तर उनीनिकट नेताहरु भने अहिले प्रचण्डसँग छन् ।