बादल पक्षको अलग्गै बैठक, मन्त्रीबाट राजीनामा दिन दबाब

काठमाडौं । गृहमन्त्री रामबहादुर थापा बादल प्रतिनिधिसभा विघटनपछिका बैठकमा प्रधानमन्त्री केपी शर्मा ओलीसँगै देखिएपछि प्रचण्ड माधव नेपाल पक्षमा उनी ओलीतिरै लागेको निष्कर्ष निस्कियो ।

बालुवाटारमै बसेको प्रचण्ड अध्यक्षताको स्थायी कमिटी बैठकमा पनि बादल गएनन् । बादल ओलीको पक्षमा रहे पनि उनी निकट देव गुरुङ,पम्फा भुसाल लगायतका नेताहरु भने ओलीको विपक्षमा छन् । बादलमाथि हिजो बेलुकादेखिनै मन्त्रीबाट राजीनामा दिन उनी निकट नेताहरुले दबाब बढाएका छन् ।

संसद भंग गर्ने सरकरको सिफारिस र राष्ट्रपतिको स्वीकृतिप्रति असहमति जनाउँदै आइतबार नै सात मन्त्रीले राजीनामा दिँदा नै बादललाई राजीनामा गर्नुपर्छ भनी उनको समूहका नेताहरुले दबाब दिए पनि मानेका थिएनन् । आज बिहान बालुवाटारमा आयोजित प्रधानमन्त्रीपक्षीय सांसदहरुको भेलामा उनी गएनन् ।

स्रोतका अनुसार,अहिले मन्त्री निवास पुल्चोकमा पूर्वमाओवादी केन्द्रको बादल समूहको बेग्लै छलफल चलिरहेको छ । उक्त समूहका नेतामध्ये स्वयं बादल र उनका सल्लाहकार सूर्यप्रकाश सुवेदी (पथिक) मात्र प्रधानमन्त्रीको पक्षमा छन् ।
अहिले पुल्चोकमा बादललाई राजीनामा गराएर कित्ता प्रष्ट पार्न दबाब दिइँदै छ । तर, राजीनामा दिने, नदिनेबारे कुनै टुंगो लागेको छैन ।

‘बादलले राजीनामा दिने कुरा के भयो ?’ भनी नेपाल प्रेसले सोधेको प्रश्नमा उक्त समूहका नेता एवं नेकपाका केन्द्रीय सदस्य महेश्वर दाहालले आफूहरु छलफलमै रहेको बताए ।