वार्नर ब्रोजद्वारा २०२३ मा ठूला तीन फिल्म रिलिज घोषणा

सन् २०२१ का लागि सबै फिल्म स्ट्रिमिङ गर्ने घोषणा गरेको हलिउड स्टुडियो वार्नर ब्रोजले सन् २०२३ का लागि तीन प्रतीक्षित रिलिज डेट घोषणा गरेको छ ।

जसमा ‘म्याड म्याक्स फ्युरी रोड’को प्रिक्वेल ‘फ्युरिओसा’, सांगीतिक एडप्टेसन ‘द कलर पर्पल’ र फ्यामिली ड्रामा ‘क्योटी भर्सेस एक्मी’ छन् । आन्या टेलरको मुख्य भूमिका रहने ‘फ्युरिओसा’ उक्त वर्षको जून २३ मा रिलिज हुनेछ ।

लाइभ एक्सन र एनिमेटेड हाइव्रिड फिल्म ‘क्योटी भर्सेस एक्मी’ जुलाई २१ मा लाग्नेछ । ‘द कलर पर्पल’ डिसेम्बर २० को विदामा रिलिज हुनेछ । डिसेम्बरको सुरुआतमा वार्नर ब्रोजले २०२१ का फिल्म ‘द म्याट्रिक्स ४’, ‘ड्युन’ र ‘द सुसाइड स्क्वाड’लाई एचबीओबाट स्ट्रिमिङ गर्ने घोषणा गरेको थियो ।

सबै फिल्मलाई स्ट्रिमिङ गर्ने घोषणा गरेपछि सबैतिरबाट चर्को आलोचना खेपेको स्टुडियोले महामारीको कालखण्डमा हाइव्रिड वितरणका मोडेललाई प्रयोग गरेको जनाएको छ । बुधबारको यो घोषणापछि पनि वार्नर ब्रोज थिएटर रिलिजमै प्रतिबद्ध भएको संकेत मिल्छ ।