संसद विघटनलाई लिएर सेलेव्रिटी नेता विभाजित

संसद विघटनलाई लिएर नेपाली फिल्म क्षेत्र पनि विभाजित भएको छ । नेकपा निकट मानिएका केही फिल्मकर्मीले प्रधानमन्त्रीको कदमलाई लिएर आ–आफ्ना दृष्टिकोण पेश गरेका छन् ।

केही फिल्मकर्मीले विघटनलाई संवैधानिक ‘कू’ भन्दै प्रतिगमनतर्फको यात्रा भनेका छन् । कतिपयले प्रधानमन्त्रीको कदमलाई समर्थन गरेका छन् । विरोध गर्नेहरुले प्रबुद्ध नागरिकको नाममा विज्ञप्ती नै प्रकाशन गरेर ‘असंवैधानिक’ करार गरेका हुन् ।

असंवैधानिक र अमानवीय भन्दै विरोध गर्नेहरुमा फिल्म निर्देशक केपी पाठक, मनोज पण्डित, अभिनेता राजन खतिवडा छन् । साथै, यो सूचिमा लेखक खगेन्द्र संग्रौला, नारायण वाग्ले, घिमिरे युवराज, विप्लव प्रतीक लगायत छन् ।

साथै, प्रधानमन्त्री निकट मानिएका चलचित्र विकास बोर्ड अध्यक्ष दयाराम दाहाल, फिल्म निर्देशक दिनेश डीसी यसबारे मौन छन् । फिल्म लेखक प्रदीप भारद्धाजले खुलेरै प्रधानमन्त्री ओलीको समर्थनमा धारणा व्यक्त गरेका छन् । उनले ताजा जनादेश लिनको लागि प्रधानमन्त्रीले गरेको चुनाव आह्वानलाई सहि भनेका छन् ।

अभिनेता एवं निर्माता दीपकराज गिरीले सन्तुलनकारी अभिव्यक्ति दिएका छन् । उनले पाँच वर्ष नपुग्दै संसद विघटन गर्ने प्रधानमन्त्रीको कदमलाई ‘अव्यवहारिक’को संज्ञा दिएका छन् । जनता समाजवादी नेता बाबुराम भट्टराई निकट मानिने अभिनेत्री करिश्मा मानन्धरले विघटन कदमको विरोध गरेकी छन् ।