कोरोनाभाइरसको नयाँ प्रजाति अन्य मुलुकमा फैलन थाल्यो

बेलायतमा भेटिएको कोरोनाभाइरसको नयाँ प्रजाति अन्य मुलुकमा समेत फैलिन थालेको छ । फ्रान्समा पहिलोपटक भेटिएको त्यहाँका अधिकारीले जनाएका छन् ।

फ्रान्सको स्वास्थ्य मन्त्रालयका अनुसार गतसाता लन्डनबाट पेरिस फर्किएका एकजना पुरुषमा यस्तो खाले भाइरस फेला परेको थियो । कुनै लक्षण नदेखिएका उनलाई टुर्सस्थित घरमा एकान्तवास राखिएको जनाइएको छ ।

बेलायतसँगको यात्रा प्रतिबन्ध हटाएपछि फ्रान्समा संक्रमण भेटिएको हो । यसअघि भाइरसको उक्त नयाँ प्रकार डेनमार्क, अष्ट्रेलिया र नेदरल्यान्डमा पनि भेटिएको थियो ।

भाइरस संक्रमण व्यापक भएपछि नेपालसहित दुईदर्जन मुलुकले बेलायतसँगको हवाइ सम्पर्क विच्छेद गरेका छन् । कोभिड–१९ का कारण युकेमा ७० हजारभन्दा बढीको ज्यान गएको छ । भाइरसको संक्रमण ह्वात्तै बढेपछि बेलायतमा अहिले लकडाउन छ ।