पूर्वमन्त्री पुनको आरोपः प्रधानमन्त्रीले मन्त्रीको वास्तै गरेनन्

काठमाडौं । संसद विघटनपछि ऊर्जामन्त्रीबाट राजीनामा दिएका वर्षमान पुनले प्रधानमन्त्रीले मन्त्रीहरुको वास्तै नगरी निर्णय लाद्ने गरेको आरोप लगाएका छन् । प्रचण्ड–माधव नेपाल पक्षीय जनसांस्कृतिक मञ्चले सोमबार पेरिसडाँडामा आयोजना गरेको कार्यक्रममा बोल्दै उनले मन्त्रिपरिषदमा मन्त्रीहरु पुगिनसक्दै संसद विघटनको निर्णय सुनाएको बताए ।

‘त्यो दिन मन्त्रिपरिषद बैठकमा पुग्ने नवौं मन्त्री मै थिएँ’ उनले भने, ‘२५ जनाको मन्त्रिपरिषदमा ९ मन्त्री मात्रै हुँदा प्रधानमन्त्रीले त्यस्तो निर्णय सुनाए ।’ उनले बैठक बस्नुपूर्व नै निर्णय तयार पारिसकेको बताए ।

त्यस्तै उनले संवैधानिक परिषदसम्बन्धी अध्यादेश पनि अपारदर्शी रूपमा आएको बताए । प्रधानमन्त्रीले मनलाग्दी गर्दा पनि अनुशासनका कारण आफूहरु चुप लागेर बस्नुपरेको भन्दै उनले गुनासो गरे ।