किन आन्दोलनमा उत्रिए पठाओ राइडर ?

काठमाडौं । मोटरसाइकल राइड शेयरिङ एप पठाओका राइडरहरुले आफ्नो माग पूरा नगरेको भन्दै पठाओको कार्यालयमा नाराबाजीसहित तोडफोड गरेका छन् ।

कम्पनीले आफूखुशी निर्णय गरेको, कुनै सेवासुविधा नदिएको, राइडिङबापतको कमिसन धेरै लिएको भन्दै पठाओ राइडरहरु आन्दोलनमा उत्रिएका हुन् ।

आन्दोलनमा उत्रिएका राइडरहरुले गत सोमबार आफ्नो माग पूरा गर्नुपर्ने भन्दै ११ बुँदे माग राखेका थिए ।

उनीहरुले बीमा सेवा हुनुपर्ने, ग्राहकसँग जोडिंदा कम्पनीले लिंदै आएको सेवा शुल्क घटाउनुपर्ने, पूर्वजानकारी विना हटाउन नपाइने, कम्पनीले ग्राहकको मात्र नभई राइडरहरुको पनि दोहोरो कुरा सुनुवाई हुनुपर्ने, संकलन दर घटाउनुपर्ने माग राखेका थिए ।

यस्तै राइडरहरुले कम्पनीलाई बुझाउनुपर्ने सेवा शुल्क बापतको बाँकी रकम बढाउनुपर्ने, खल्ती मोबाइल वालेटबाट जति पनि तिर्न पाउनुपर्ने, कस्टमर केयर नम्बरहरु टोल फ्रि हुनुपर्ने, विपीजीको कारण राइडरलाई हटाउन नपाइने, सस्पेण्ड रेकर्ड राख्नुपर्ने, राइडरले स्वेच्छाले क्यान्सिल गराउन पाउनुपर्नेलगायतका ११ बुँदे माग राइडरहरुले पठाओ कम्पनीमा राखेका थिए ।

तर कम्पनीले आफनो माग सम्बोधन गर्न चासो नदिएको भन्दै आन्दोलनमा उत्रिनुपरेको पठाओ राइडर शान्तिका नेपालले बताए ।

पठाओ एप मार्फत ग्राहकले आवश्यकता अनुसार मोटरसाइकल तथा ट्याक्सी सेवा लिनको लागि राइडर र ग्राहकलाई जोड्ने काम गर्छ ।

दुई वर्ष अघिदेखि सञ्चालनमा आएको पठाओमा हाल ७५ हजार राइडरहरु आवद्ध भएका छन् ।

ग्राहकलाई सेवा प्रवाह गर्दै आएका राइडरहरु समूहबद्ध भई कम्पनीमा आएर सेवा प्रवाह गर्न थप सजिलो होस् भनेर केही बुँदा मागहरु राखेकाेमा अनर्गल प्रचारबाजी गरी कम्पनीले गर्दै आएको काममा नकारात्मक असर परेको पठाओले विज्ञप्तिमार्फत जनाएको छ ।

कम्पनीले भने राइडरहरुले राखेका कतिपय मागहरु कम्पनीको नियम विपरीत रहेको बताएका छन् ।

कम्पनीले राइडरहरुको माग सम्बोधनको प्रयास भइरहेको बतायाे ।

पठाओले राइडरले राखेका मागहरुको विषयमा स्पष्ट धारणा राखेकाले अनावश्यक विवाद निकाल्नु उचित नभएको समेत बताएको छ ।