चेल्सीको लगातार कमजोर प्रदर्शन, एस्टोन भिल्लासँग बराबरी

एजेन्सी । इंग्लिस क्लब चेल्सीका पूर्व स्ट्राइकर क्रिस सटनले नियमित जितको निरन्तरता दिन नसक्ने हो भने क्लबका प्रशिक्षक फ्र्यांक लाम्पार्डको भविश्य खराव बन्दै गइरहेको टिप्पणी गरेका छन् ।

१२ डिसेम्बरमा एभर्टनलाई पराजित गर्न सकेको भए चेल्सी प्रिमियर लिगको शीर्ष स्थानमा पुग्ने थियो । तर त्यसो हुन सकेन ।

पछिल्ला ५ मध्ये चौथो खेलमा चेल्सीले स्पष्ट तीन अंक हासिल गर्न नसकेको हो । गएराति उसले एस्टोन भिल्लासँग १–१ गोलको बराबरी खेल्यो ।

‘यो समयमा उनीहरु संघटग्रस्त क्लब हुन् । किनभने उनीहरुले राम्रो प्रदर्शन गर्न सकिरहेका छैनन्,’ सटनले बीबीसी रेडियोसँग भने, ‘उनीहरु भुत्ते भएका छन् र फ्र्यांकले छिट्टै केहि गर्नुपर्छ । हामी सबैले बुझेका छौं चेल्सी खराव दिशामा छ ।’

यो खेलमा जित हासिल गरेको अवस्थामा चेल्सी चौथो स्थानमा पुग्ने थियो । १६ खेलबाट उसको २६ अंक भएको छ र छैटौं स्थानमा छ । शीर्ष स्थानको लिभरपुलसँग ६ अंकको दूरीमा छ ।

सोमबार रातीकै खेलमा क्रिष्टल प्यालेस र लेस्टर सिटीबीचको खेल पनि १–१ को बराबरीमै सकिएको छ । लिगमा लगातार दोस्रो बराबरी खेलेको लेस्टर दोस्रो स्थानमा यथावत छ । उसको १६ खेलबाट २९ अंक भएको छ ।

कोरोना संक्रमित पाइएपछि म्यानचेस्टर सिटी र एभर्टनबीचको खेल स्थगित गरिएको छ ।