विप्लव, वैद्य र आहुतिसहित चार पार्टीको रणनीतिक मोर्चा बन्ने

काठमाडौं । प्रतिबन्धित नेत्रविक्रम चन्द (विप्लब) नेतृत्वको नेकपा सहित चार साना कम्युनिस्ट घटकले प्रतिनिधिसभा विघटन राज्यसत्तामाथिको संकट भन्दै यो नेकपाको आन्तरिक मामिला नभएर राज्य व्यवस्थाको असफलता भनेका छन् ।

विप्लब सहित क्रान्तिकारी माओवादीका महासचिव मोहन वैद्य किरण, नेपाल कम्युनिस्ट पार्टीका अध्यक्ष ऋषिराम कट्टेल र वैज्ञानिक समाजवादी कम्युनिस्ट पार्टीका संयोजक आहुतीले संयुक्त विज्ञप्ति जारी गरि प्रतिनिधिसभा पुन:स्थापना वा मध्यावधी निर्वाचनले संकटको समाधान नहुने दावी गरेका छन् ।

उनीहरुले यो व्यवस्थाभित्र सरकार परिवर्तन गरेरमात्र केही नहुने भन्दै वर्तमान राज्यसत्ताको अन्त्य र संघीय जनगणतन्त्र, वैज्ञानिक समाजवादको स्थापना हुनुपर्ने बताएका छन् ।

उनीहरुले चार पार्टीबीच रणनीतिक संयुक्त मोर्चा निर्माण गर्ने सहमति भएको समेत बताएका छन् । यसको संरचना र कार्यक्रम पछि घोषणा गरिने भएको छ ।

तत्कालिन नेकपा एमाले र माओवादी केन्द्रबीच एकीकरण भएर नेकपा बनेपछि आफ्नो पार्टीको नाम दावी गर्दै ऋषि कट्टेलले निर्वाचन आयोगमा उजुरी दिएका थिए । आयोगले ओली प्रचण्ड नेतृत्वको नेकपालाई मान्यता दिएपछि उनी २०७५ मंसिरमा सर्वोच्च अदालत गएका थिए । कट्टेलको दावीपछि ओली प्रचण्ड नेतृत्वको नेकपाले ब्राकेटमा नेकपा थपेको थियो ।