मुख्यमन्त्री राईले भने- प्रदेश संरचना जोगाउन कांग्रेसले साथ दिने विश्वास छ

काठमाडौं । प्रदेश १ का मुख्यमन्त्री शेरधन राईले प्रचण्ड–माधव नेपाल पक्षले हठात् अविश्वास प्रस्ताव ल्याएर प्रदेश संरचनामाथि आक्रमण गरेको भन्दै यस्तो कदम जारी रहे प्रदेशसभा भंग हुनसक्ने चेतावनी दिएका छन् ।

जनतासँग मुख्यमन्त्री कार्यक्रममा बोल्दै राईले आफू नेपाली कांग्रेसलगायतका विपक्षी दलसँग संवादमा रहेको बताए । उनले प्रदेश संरचना जोगाउन कांग्रेसले विवेकसम्मत निर्णय लिने अपेक्षा आफूले गरेको बताए ।

राईले भने- ‘यो भनेको प्रदेश संरचनामाथि आक्रमण हो । उहाँहरुका यस्ता हर्कतले प्रदेश संरचना विघटन हुन पनि सक्छ । मलाई विश्वास छ, प्रदेश संरचना विघटन गर्ने अवस्थामा कांग्रेस उभिंदैन । जबर्जस्ती यस्ता प्रयास गरिए भने भंग हुने अवस्था आउन सक्छ ।’

मुख्यमन्त्री राईले दल औपचारिक विभाजन भयो भने कांग्रेसको समर्थन विना सरकार बन्न नसक्ने अवस्था आउने भन्दै त्यसका लागि छलफल भइरहेको बताए । उनले त्यसपछि मात्र मन्त्रिपरिषद विस्तार तथा पुनर्गठन हुने जानकारी दिए ।

आफूमाथि प्रचण्ड-माधव पक्षले अविश्वास प्रस्तावमा लगाएका आरोपको प्रदेशसभामा एक एक जवाफ दिने राईले बताए ।

नेकपा संसदीय दल विभाजन नभएकाले अनुशासन र विधान विपरित काम गर्नेहरुलाई ऐन बमोजिम कारबही हुने चेतावनी समेत राईले दिए ।

पार्टीभित्रैबाट घेराबन्दी गरेर प्रधानमन्त्रीलाई कामै गर्न नदिएपछि जनतामा जान प्रतिनिधिसभा विघटन गरिएको भन्दै नेताहरुका पछिल्ला अभिव्यक्ति हेर्दा अ‍ोलीमाथि उनीहरुले कति आक्रमण गरेका रहेछन् भन्ने पुष्टि हुने उनले बताए ।