सुरक्षाको नजरमा नेपालका पाँच ‘फेसन कन्सस’ नेता

सुरक्षा पन्तसँग धेरै रुचि जोडिएका छन् । अभिनय, संचारकर्मी, इन्जिनियर, अभियन्ता र लेखिका । हालैको अपरान्ह ‘आमा’ अभिनेत्री फिल्म, राजनीति, समाज र तन्नेरीको विषयमा गफिने मुडमा भेटिइन् । ‘पल्टिकल एवं फेसन कन्सस’ भएकी अभिनेत्रीको रुपमा सुरक्षालाई अग्रणी रुपमा लिन सकिन्छ ।

उनी संसद विघटनदेखि नेकपा विभाजनसम्मको राजनीतिक विकासक्रमलाई ‘स्वभाविक’ रुपमा लिन्छिन् । ‘यस्तो हुनु नै थियो’ उनको कथन छ, ‘नेपालको दलिय राजनीतिको अवस्था हेर्दा यस्तो हुने कुरालाई अस्वभाविकरुपमा लिन्न ।’

नेताहरु कत्तिको फेसन कन्सस छन् त ? नेपाल प्रेससँग नेताको फेसन रुचिबारे सुरक्षा खुलिन् । उनको नजरमा केही यस्ता नेता छन् जसले फेसनलाई पनि अगाडि बढाउँछन् । गगन थापा, रविन्द्र मिश्र, योगेश भट्टराई, शशांक कोइराला र विना मगर उनको नजरमा ह्यान्डसम एवं ब्युटीफुल नेता हुन् ।

‘उहाँहरु राजनीतिका फेसन कन्सस मान्छे हुनुहुन्छ’ उनी भन्छिन्, ‘राष्ट्रपति विद्यादेवी भण्डारीदेखि कांग्रेस संस्थापक बीपी कोइरालासम्म फेसन कन्सस लाग्छ ।’ सुरक्षाको मुख्य भूमिका रहेको फिल्म ‘आमा’ अहिले नेपाली फिल्म हलहरुमा प्रदर्शन भैरहेको छ ।