प्राधिकरणको प्रष्टीकरणः ‘फोर्स लोडसेडिङ’ होइन, प्राविधिक समस्या

काठमाडौं । केहीदिन यता जानकारीबिना नै विद्युत कटौती हुन थालेपछि सर्वसाधरणले लोडसेडिङ शुरु भएको हो कि ! भन्ने चर्चा हुन थालेपछि विद्युत प्राधिकरणले प्रष्टीकरण दिएको छ । विज्ञप्ति जारी गर्दै प्राधिकरणले ३ वर्ष देखि नै लोडसेडिङ अन्त्य भइसकेको र लोडसेडिङ गर्नुपर्ने स्थिति नआएको जनाएको छ ।

माग भन्दा आपूर्ति कम भएको अवस्थामा मात्र लोडसेडिङ गर्नुपर्ने बाध्यता रहने प्राधिकरणले जनाएको छ । हाल नेपालमा विद्युत प्रणालीमा प्राधिकरणको आन्तरिक उत्पादन, निजी क्षेत्रको उत्पादन र अपुग हुँदा भारतबाट आयात गरी विद्युत माग बराबर नै आपूर्ति गरिराखेकोले लोडसेडिङ नभएको प्राधिकरणका प्रवक्ता मदन तिम्सिनाले बताए ।

राष्ट्रिय विद्युत प्रणालीमा भारवहन क्षमता भन्दा बढी विद्युत प्रवाह हुँदा केही समय विद्युत प्रसारण तथा आपूर्तिमा भएको अवरोध लोडसेडिङ नभएको समेत प्राधिकरणले स्पष्ट पारेको छ ।

प्राधिकरणका प्रवक्ता तिम्सीनाका अनुसार विद्युतको पोल सार्ने, ट्रान्सर्फमर प्रस्थिापन गर्न वितरण प्रणालीका पुराना संरचनाहरु मर्मत सम्भार तथा बदली गर्दा विद्युत आपूर्तिमा समस्या आउँछ । साथै, विद्युत प्रवाह भइरेहको संरचनामा आउने प्राकृतिक तथा आकस्मिक समस्याहरु आउँदा सम्बन्धित स्थानको विद्युत आपूर्ति काटेर तत्कालै मर्मत संभार गरी विद्युत आपूर्ति सूचारु गर्ने गरिएको उनले बताए ।