कांग्रेस बैठक आजः आन्दोलनमा जाने कि अदालतको फैसला कुर्ने ?

काठमाडौं । प्रतिनिधिसभा पुनर्स्थापनाको लागि आन्दोलन गर्ने कि सर्वोच्च अदालतको फैसला कुर्ने भन्ने विवाद चलिरहेको बेला नेपाली कांग्रेस केन्द्रीय कार्यसमितिको बैठक आज बस्दैछ ।

करीब एक साताको विश्रामपछि कांग्रेस बैठक फेरि शुरु हुन लागेको हो । बैठकमा केन्द्रीय सदस्यहरूले धारणा राख्ने क्रम जारी छ ।

कांग्रेसको जारी बैठकमा प्रतिनिधिसभा विघटन असंवैधानिक र अलोकतान्त्रिक हो भन्नेमा एकमत रहे पनि त्यसको विरुद्ध आन्दोलनमा जाने कुरामा सभापति शेरबहादुर देउवा पक्ष सहमत छैन ।

रामचन्द्र पौडेल पक्ष प्रतिनिधिसभा पुनर्स्थापनाको लागि आन्दोलन जारी राख्नुपर्ने पक्षमा छ । पौडेल पक्षले गत साता भेला नै राखेर अलग प्रस्ताव लैजाने निर्णय गरेको थियोे ।

सभापति देउवा सर्वोच्च अदालतको फैसला जे आउँछ सोही अनुसार अघि बढ्नुपर्ने पक्षमा छन् । देउवाले सडक आन्दोलनमा रुचि देखाएका छैनन् ।