२०३० सम्म नेपाली फिल्मको स्टोरी–टेलिङ विश्व बजारमा स्थापित हुन्छ : दयाहाङ

सन् २०३० सम्म नेपाली फिल्मको मौलिक कथा भन्ने शैली विश्व बजारमा स्थापित हुने आशा अभिनेता दयाहाङ राईले व्यक्त गरेका छन् । त्यो बेलासम्म नेपाली फिल्मको आफ्नै खाले स्टोरी टेलिङ स्थापित हुने उनको विश्वास छ । ‘अहिले पनि एकाध नेपाली फिल्मलाई विश्व बजारका दर्शकले हेर्नुभएको छ’ उनले भने, ‘अबको दस वर्षमा यो कुरा स्थापित हुनेछ ।’

दसवर्ष अगाडि आफू अभिनेता हुने कुरा समेत परिकल्पना नगरेको ‘कबड्डी’ फेम्ड अभिनेताको तर्क छ । ‘त्यतिबेला म एक्टर हुन्छु र यो विन्दुमा आइपुग्छु भन्ने लागेको थिएन’ उनले भने, ‘अहिले अलिअलि दर्शकले चिन्नुहुन्छ ।’ आफूजस्ता मान्छेको कथा नेपाली फिल्मले भन्नेछ भनेर त्यतिबेला नसोचेको उनको ठम्याइ छ । जसै गणतन्त्र आयो र दयाहाङजस्ता चिम्सा आँखा हुने अनुहार नेपाली फिल्मको मूलधारमा स्थापित हुन थाले ।

नेपाली फिल्ममा अभिनय र निर्माणको आफ्नै शैली हुनुपर्छ भनेर भनिरहने दयाहाङको सेतो सूर्य, टलकजङ भर्सेस टुल्के र दासढुंगा चर्चित फिल्म हुन् । नेपाली फिल्म अझै खाली रहेको बताउँदै दयाहाङले सिर्जना भएका युवाहरुलाई आउन आग्रह गरे । नेपाली समाजको आदर्श कथामा फिल्म गर्न मन भएको बताउँदै दयाहाङले अहिलेको समय सानातिन कुरामा अल्झिने खालको नभएको बताए ।

नेपाली फिल्मका निर्मातालाई निर्माणको बारेमा ज्ञान नभएको तर्क उनको छ । नेपाली फिल्मले कथा नै भन्न नसकेको उनको दाबी छ । ‘नेपाली फिल्म जहाँ पुग्नुपर्ने हो त्यहाँ पु¥याउन सकिरहेका छैनौं । त्यसैले खाली छ । आउनूस मिलेर काम गरौं’ उनले भने ।