कोरोना महामारीको अनुसन्धानमा चीनको व्यवहारले डब्ल्यूएचओ निराश

एजेन्सी । विश्व स्वास्थ्य संगठन (डब्ल्यूएचओ)ले कोरोना महामारीको अनुसन्धानका क्रममा चीनको व्यवहारप्रति असन्तुष्टि व्यक्त गरेको छ । डब्ल्यूएचओले भनेको छ कि अनुसन्धानमा चीनले देखाएको रबैयाबाट उनीहरु निकै निराश छन् ।

विश्व स्वास्थ्य संगठनका प्रमुख टेड्रोस अधानमले मंगलबारको पत्रकार सम्मेलनमा चीनले कोरोना सुरुआतको अनुसन्धानका लागि असहयोग गरेको आरोप लगाएको रोयटर्सलाई उदृत गरी बीबीसीले जनाएको छ ।

चीनले अहिलेसम्म कोरोना महामारीको सुरुआत कहाँबाट भएको र त्यसको जाँचका लागि विशेषज्ञको टोलीलाई आफ्नो देशमा आउन अनुमति नदिएको डब्ल्यूएचओको भनाई छ ।

जनवरीको सुरुआत मै विशेषज्ञको एउटा टोली अघिल्लो वर्ष चीनबाट सुरु भइ विश्वव्यापी महामारीको रुप लिएको कोरोनाको उद्गमस्थल वुहान जाँदै थियो ।

जेनेभामा एक अनलाइन पत्रकार सम्मेलनमा डब्ल्यूएचओका निर्देशकले भने, ‘हामीलाई थाहा भएको छ कि अहिलेसम्म चिनियाँ अधिकारीहरुले त्यहाँसम्म पुग्नका लागि अत्यावश्यक अनुमतिका लागि सहमति दिएका छैनन । म लगातार चीनका वरिष्ठ अधिकारीहरुसँग सम्पर्कमा छु र मैले यो स्पष्ट पारेको छु कि यो मिसन डब्ल्यूएचओको प्राथमिकतामा सन्चालित छ ।’