रामनारायण बिडारीको मागः संविधान बनाउने बेलाको ‘टेप रेकर्ड’ सदनमा बजाइयोस्

काठमाडौं । राष्ट्रियसभा सदस्य रामनारायण बिडारीले संविधान बनाउँदा भएको बहसको ‘टेप रेकर्ड’सदनमा बजाउन माग गरेका छन् ।

बिहीबार राष्ट्रियसभामा बोल्दै बिडारीले त्यसबाट को गलत को सही भन्ने थाहा हुने दावी गरे। ‘संविधान मस्यौदा गर्दा गर्दा १५ जनाको मस्यौदा कार्यदल बनाएको थियो, त्यसको एकजना सदस्य म पनि थिएँ,’ उनले भने, ‘विज्ञ टिम बनाएको थियो तत्कालीन मान्य कृष्ण सिटौलाको अध्यक्षतामा । त्यो पाँच जनाको टिममा म पनि थिएँ । केपी शर्मा ओली अहिलेको प्रधानमन्त्री बारम्बार त्यहाँ आउनुहुन्थ्यो । सुवास नेम्वाङ त्यो बेला संविधानसभा अध्यक्ष हुनुहुन्थ्यो । त्यहाँ भएका कुराको टेप रेकर्डलाई यो सदनमा बजाइयोस् अनि हामीले कति नालायक काम गरेछौं भन्ने कुरा स्पष्ट हुन्छ ।’

बिडारीले प्रधानमन्त्रीले संसद विघटन गर्नु असंवैधानिक भएको समेत दावी गरे। विभाजित नेकपाबाट राष्ट्रियसभा सदस्य भएका बिडारी प्रचण्ड–माधव पक्षका मानिन्छन्।