परराष्ट्रमन्त्री माघ १ मा दिल्ली जाने प्रधानमन्त्रीद्वारा जानकारी

काठमाडौं । परराष्ट्रमन्त्री प्रदीप ज्ञवाली आगामी माघ १ गते भारत भ्रमणमा जाने निश्चित भएको छ । प्रधानमन्त्री केपी शर्मा ओलीले धनगढीमा नेकपाले आयोजना गरेको प्रदेशस्तरीय जनसभालाई सम्बोधन गर्दै परराष्ट्रमन्त्रीको भ्रमणमा सिमा नाकाहरुको विषयमा भारतसँग कुरा हुने बताए ।

प्रधानमन्त्रीले गौरीफण्टा नाका सुचारु गर्ने र अन्य नाका व्यवस्थित गर्ने लगायत राष्ट्रहितको विषयमा कुरा हुने बताए । नाकाबन्दीका डेटर सामना गर्दा जनताले साथ दिएको स्मरण गर्दै ओलीले देशको हितमा सरकारले कसैसँग नझुकी काम गर्ने बताए ।

प्रधानमन्त्रीले ५८ वर्षदेखि हडपिएको नेपाली भूभाग समेटेर नक्सा पारित गर्ने र संविधान संशोधन गर्ने काम आफ्नो नेतृत्वमा भएको भन्दै ओलीले त्यहि दिनदेखि आफूविरुद्ध पार्टीभित्रबाट षडयन्त्र शुरु भएको दावी गरे ।

ओलीले नेपाली भूमि फिर्ता ल्याउने बताए । भारतीय विदेशमन्त्री एस जयशंकरको निमन्त्रणामा मन्त्री ज्ञवाली भारत भ्रमणमा जादैछन् ।