थारुलाई ओलीको आश्वासन–प्रचण्डले जात जात भिडाए, म समाधान दिन्छु

काठमाडौं । पार्टी विभाजनपछि पहिलो पटक काठमाडौं बाहिर कार्यक्रममा निस्केका प्रधानमन्त्री केपी शर्मा अ‍ोलीले धनगढी पुगेर प्रचण्ड–माधव नेपाल र भीम रावलको आलोचनामात्र गरेनन्, थारु समुदायका असन्तुष्टि सम्बोधन गर्ने प्रयास पनि गरे ।

धनगढीको खुलामन्चमा शुक्रवार आयोजित नेकपाको जनसभामा भाग लिन टीकापुरदेखिका थारुहरु पनि ठूलो संख्यामा पुगेका थिए । उनीहरुका कतिपय आफन्त टीकापुर घटनाको घानमा परेर अहिले पनि जेलमा छन् भने कोही भारततिर भागेर बसेका छन् ।

प्रचण्डहरुको जातीय पहिचानको नाराकै कारण जातजातबीच भिडन्त निम्त्याउन खोजिएको र आफूले जातीय संघीयताको विरोध गरेर संविधान बनाएको अ‍ोलीले बताए । प्रधानमन्त्रीले प्रचण्डलगायतका केही नेता र दलले देशलाई जात जातबीच भिडाएर रुवाण्डा बनाउन खोजेका थिए भने ।

ओलीले थारु समुदायमाथि सोही क्रममा ज्यादती भएको भन्दै आफूले यो विषयलाई समाधान गर्ने बताए । कन्चनपुरदेखि झापासम्मको भूभाग थारुको भएको भन्दै उनले थारुमाथि अन्याय हुन नदिने बताए ।

ओलीले भने–पहिले नै अदालती प्रक्रियामा गएकाहरुलाई मुद्दाको किनारा नपुगी अहिले हामीले केही गर्न सक्दैनौं । कतिपय थारु साथीहरु जेलमा छन् । त्यो प्रक्रिया सकिएपछि हामी समाधान दिन्छौं । यो भूमि हामी सबैको साझा हो । थारु यो देशमा मात्रै छन् ।