प्रचण्ड–माधव पक्षले सडकमा संविधान वाचन गर्ने, विद्यार्थीले बयलगाडा देखाउने

काठमाडौं। प्रतिनिधिसभा विघटनविरुद्ध चरणवद्ध आन्दोलनमा रहेको विभाजित नेपाल कम्युनिष्ट पार्टी (प्रचण्ड–माधव पक्ष)ले आज सडकमा संविधान वाचन गर्दैछ ।

नेकपाको केन्द्रीय संघर्ष समितिका सहसंयोजक एवम् स्थायी कमिटी सदस्य गणेश साहका अनुसार संविधानमा प्रतिनिधिसभा विघटन गर्ने अधिकार प्रधानमन्त्रीलाई नभएको भन्दै देशैभर सडकमै संविधान पढेर व्याख्या गर्न लागिएको हो ।

राजधानीमा भने दिउँसो एक बजे सडकमा संविधान वाचन हुने छ।

विद्यार्थीले बयलगाडा प्रदर्शन गर्ने

त्यस्तै प्रतिनिधिसभा विघटनविरद्ध चरणवद्ध आन्दोलनमा उत्रिएको प्रचण्ड–माधव पक्षीय अनेरास्ववियूले बयलगाडा प्रदर्शन गर्ने भएको छ । दिउँसो दुई बजे माइतघर मण्डलामा बयलगाडा प्रदर्शन गर्ने तयारी अनेरास्ववियूयको भए पनि प्रहरीले हस्तक्षेप गर्नसक्ने भएकाले कार्यक्रमको स्वरुप परिवर्तन गरिने भएको छ ।

अनेरास्ववियूका सहसंयोजक रञ्जित तामाङले बयगाडा प्रदर्शन गर्नुको अर्थ प्रधानमन्त्री ओली अहिलेको व्यवस्था विरोधी रहेको देखाउनु रहेको बताए ।
तामाङले नेपाल प्रेससँग भने– गणतन्त्रको आन्दोलन हुँदा केपी ओली बयलगाडा पुगेर अमेरिका पुगिन्न भनेर खिसिट्युरी गर्नुहुन्थ्यो । बाध्यताले उहाँले गणतन्त्र, संघीयता स्वीकार गर्नुभएको हो । तर, उहाँले अहिले व्यवस्थाविरोधी हर्कत देखाइरहनु भएको छ । त्यसलाई सांकेतिक रुपमा जनाउँन हामीले बयलगाडा प्रदर्शन गर्न लागेका हौं ।’