चार पूर्व प्रधानन्यायाधीशको प्रतिरक्षामा उभियो प्रचण्ड–माधव समूह (भिडियो)

काठमाडौं । विभाजित नेकपाको प्रचण्ड–माधव नेपाल पक्षले चारजना पूर्व प्रधानन्यायाधीशहरुको प्रतिरक्षमा उभिएको छ ।

आइतवार साँझ सम्पन्न उक्त समूहको सचिवालय बैठकले पूर्व प्रधानन्यायाधीशहरुलाई प्रधानमन्त्रीले धम्की दिएको भन्दै आपत्ति जनाएको छ ।

बैठकपछि पत्रकारहरुसँग कुरा गर्दै प्रचण्ड-माधव समूहका प्रवक्ता नारायणकाजी श्रेष्ठले पूर्व प्रधानन्यायाधीशहरुले स्वतन्त्र नागरिकको हैसियतमा सत्य कुरा बोल्दा प्रधानमन्त्रीले धम्क्याउने र अपमान गर्ने काम गरेको आरोप लगाए ।

श्रेष्ठले भने–हरेक नागरिकले संविधान बमोजिम आफ्नो विचार राख्न पाउने स्वतन्त्रत छ । सरकारले त्यो स्वतन्त्रताको सम्मान गर्नुको साटो प्रधानमन्त्रीलेनै धम्क्याउने गर्नुभएको छ । यो स्वीकार्य छैन ।

विभाजनअघिको ९ सदस्यीय सचिवालयमध्ये आइतबारको बैठकमा ४ जना सहभागी थिए । प्रचण्ड, माधव नेपाल, झलनाथ खनाल र नारायणकाजी श्रेष्ठ बैठकमा थिए । बामदेव गौतम दुवै पक्षमा खुलेका छैनन् ।

बाँकी चारजना केपी ओली, ईश्वर पोखरेल, रामवहादुर थापा (बादल) र बिष्णु पौडेल एकातिर छन् । सचिवालय बैठकमा आन्दोलनको समिक्षा र पार्टीको कार्यविभाजन लगायतका विषयमा पनि छलफल भएको श्रेष्ठले बताए ।