सरकारले भन्यो–राजदूत फिर्ता बोलाउने कुनै तयारी छैन

काठमाडौं । सरकारले विभिन्न देशमा पठाइएका नेपाली राजदूत फिर्ता बोलाउने कुनै तयारी नभएको बताएको छ। परराष्ट्र मन्त्रालयले सोमबार विज्ञप्ति निकालेर यसमा कुनै सत्यता समेत नभएको बताएको छ।

‘राजदूतहरू फिर्ता बोलाउने गृहकार्य भन्ने विषयमा केही सञ्चार माध्यममा आएको समाचारबारे यस मन्त्रालयको ध्यानाकर्षण भएको छ,’ विज्ञप्तिमा भनिएको छ, ‘उक्त समाचारमा कुनै सत्यता नभएको ब्यहोरा जानकारी गराइन्छ। यस्ता संवेदनशील विषयहरूमा समाचार सम्प्रेषण गर्नुपूर्व आधिकारिक निकायबाट सत्यतथ्य यकिन गरेर मात्र समाचार प्रकाशन गर्नुहुन समेत यस मन्त्रालय सम्बन्धित सबैमा आग्रह गर्दछ।’

सत्तारुढ नेपाल कम्युनिष्ट पार्टी (नेकपा)मा विभाजन आएसँगै प्रचण्ड–माधव पक्षबाट राजदूत बनेर गएकाहरुलाई सरकारले फिर्ता बोलाउने आशंका कतिपयले गर्ने गरेका छन्।