एकैदिन १४ बिलियन डलर गुमाएपछि इलोन मस्क संसारका धनीको दोस्रो स्थानमा

एकैदिनमा १४ विलियन डलर सम्पत्ति गुमाएपछि टेस्ला र स्पेसएक्सका मालिक इलोन मस्क पुनः संसारकै सर्वाधिक धनीको दोस्रो स्थानमा झरेका छन् । फोर्ब्स म्यागजिनका अनुसार सोमबार टेस्ला इलेक्ट्रिक मोटरको सेयर बजारमा ८ प्रतिशतको गिरावट आएको छ । पुनः अमेजन मालिक जेफ बेजोस नम्बर एकको सूचिमा चढेका छन् ।

अहिलेको मस्कको कूल सम्पत्ति १७६.२ बिलियन डलरमा खुम्चिएको छ । अहिले मस्क बजोसभन्दा ६ बिलियन डलरले मात्र पछाडि छन् । सोमबार अमेजनको सेयर बजार पनि २ प्रतिशतले घटेको छ । गत मार्च २०२० मा टेस्लाको सेयर मार्केटमा आएको उछालसँगै मस्कको सम्पत्ति १५० विलियन डलर पुगेको थियो । टेस्लाले गत साता संसारकै मूल्यवान कम्पनीमा फेसबुकलाई उछिनेको छ ।

मस्कलाई धनी मान्ने वा नमान्ने बारेमा विश्व मिडिया नै विभाजित छ । बीबीसी, सीएनएन, ब्लुमबर्गले उनलाई नम्बर वान धनीको रुपमा लिएका छन् भने फोर्ब्सले बेजोस् र फ्रान्सेली लक्जरी धनाढ्य बर्नान्ड आर्नल्टपछिको तेस्रो स्थानमा मस्क रहेको जनाएको छ ।