रुसले नेपाललाई २ करोड ५० लाख डोज खोप दिने

मस्को । रुसले नेपाललाई कोरोना भाइरसविरुद्ध २ करोड ५० लाख डोज खोप उपलब्ध गराउने भएको छ । रुसको विदेश मन्त्रालयलाई उध्दृत गर्दै रोयटर्स समाचार एजेन्सीले रुसले आफूले विकास गरेको स्पुतनिक–फाइभ खोप नेपाललाई उपलब्ध गराउने समाचार लेखेको छ ।

खोप उपलब्ध गराउनेबारे नेपालसँग सम्झौता भएको पनि उल्लेख छ । रुसले भारतलाई पनि खोप दिने सम्झौता गरेको समाचारमा उल्लेख छ । भारतमा स्पुतनिक–भी खोपको परिक्षण गराउने पनि जनाइएको छ ।

मंगलबार मात्र स्वास्थ्य मन्त्री हृदयेश त्रिपाठीले नेपालमा खोप ल्याउन रुस, भारत र युएइसँग छलफल भैरहेको जनाएका थिए ।

नेपाललाई थाहा छैन

यसैबीच स्वास्थ्य मन्त्रालय र त्यस अन्तर्गतको खोप महाशाखाका अधिकारीहरुले भने यसबारेमा कुनै जानकारी नभएको बताएका छन् ।

नेपाल प्रेससँग कुरा गर्दै खोप महाशाखाका प्रमुख झलक गौतमले सरकारी तहबाट यसबारे अहिलेसम्म कुनै जानकारी नभएको बताए । उनले रुसको उक्क्त खोपको प्रभावकारीतामाथिनै प्रश्न रहेको बताए ।

स्वास्थ्य मन्त्रालयका सहप्रवक्ता समिर अधिकारीले पनि रुसले खोप पठाउनेबारे अनविज्ञता जाहेर गरेका छन् ।