परराष्ट्रमन्त्री दिल्ली जाँदै, सीमा विवाद र काेराेना खाेप नेपालको प्राथमिकतामा

काठमाडौं । नेपाल भारत संयुक्त आयोगको वैठकमा भाग लिन परराष्ट्रमन्त्री प्रदीप ज्ञवाली आज दिल्ली जादैछन् । परराष्ट्रमन्त्रीस्तरीय आयोगको बैठकमा सीमा विवादको विषयलाई उठाउने तयारी नेपालको छ ।

प्रधानमन्त्री केपी शर्मा ओलीले हालै सार्वजनिक कार्यक्रममै लिम्पयाधुरा, लिपुलेक र कालापानी नेपालको जमिन भएकाले त्यसलाई फिर्ता ल्याउने बताएका थिए ।

उनले परराष्ट्रमन्त्रीको भारत भ्रमणमा यी विषयमा कुरा हुने बताएका छन् । मन्त्री ज्ञवालीले भारतसँग कोभिड १९ विरुद्धको भ्याक्सिन खरिदका विषयमा पनि कुरा हुने बताएका छन् । यसबारेमा सम्झौता हुने भनिए पनि त्यसको टुंगो लागि नसकेको स्रोतले बताएको छ । तर भारतमा निर्मित खोपको प्रभावकारिता पुष्टि भएमा नेपालले भारतकै खोपलाई प्राथमिकता दिने भएको छ ।

शुक्रवार हुने संयुक्त आयोगको बैठकको अध्यक्ष परराष्ट्रमन्त्री ज्ञवाली र भारतीय समकक्षी एस जयशंकरले संयुक्त रुपमा गर्नेछन् । बैठकमा नेपालले यसपटक सीमा विवादलाईनै प्रमुख रुपमा उठाउने तयारी गरेको छ । परराष्ट्र मन्त्रालय स्रोतका अनुसार सीमा विवादलाई समाधान गर्न सचिवस्तरीय संयन्त्र छ । त्यसलाईनै मन्त्रीस्तरीय बैठक समयसीमा तोकेर जिम्मेवारी दिनसक्ने सम्भावना रहेको छ ।

कालापानी र सुस्ता क्षेत्र बाहेक अन्यत्र सीमा समस्या जटिल नरहेकोले यही विषयमा बढी छलफल गर्ने नेपालको चाहना छ । प्रधानमन्त्रीले कालापानी,लिपुलेक र लिम्यिाधुरा नेपालको भूभाग भएकाले त्यसलाई फिर्ता ल्याइने र सन् २०२१ नेपाल र भारतबीचको समस्या समाधान भएको वर्षका रुपमा रहन सक्ने कुरा हालै भारतीय टेलिभिजन च्यानलसँगको अन्तर्वार्तामा बताएका छन् ।