दुई पटकमा पासवर्ड नमिलाए २४ करोड अमेरिकी डलर बराबरको बिटक्वाइन गुम्ने

काठमाडौं । स्टेफन थोमस नामका एक प्रोगामरले २४ करोड अमेरिकी डलर बराबरको बिटक्वाइन राखेको हार्ड ड्राइभको पासवर्ड बिर्सिएका छन् । र, उनीसँग अहिले पासवर्ड मिलाउनका लागि दुई पटक मौका छ । यदि दुई पटकमा पनि पासवर्ड मिलाउन नसके उनले सबै पैसा गुमाउने छन् ।

न्युयोर्क टाइम्समा प्रकाशित एक रिपोर्टअनुसार थोमसले १० वर्षअघि क्रिप्टोकरेन्सीले कसरी काम गर्छ भन्ने विषयमा भिडियो बनाए बापत ७ हजार दुई बिटक्वाइन पाएका थिए । त्यो समयमा उनले हासिल गरेका बिटक्वाइनको मुल्य केही डलर मात्रै थियो । त्यसैले थोमसले हार्ड ड्राइभमा भएको आइरनकी डिजिटल वालेटमा राखेका थिए ।

उक्त हार्ड ड्राइभको पासवर्ड एउटा कागजको टुक्रमा लेखेर राखेका थिए । तर, त्यो कागज नै हराएपछि पासवर्ड पनि सम्झन नसकेपछि उनी संकटमा परेका छन् ।

थोमसले यसअघि ८ वटा सम्भावित पासवर्ड राखेर खोल्ने प्रयास गरिसकेका छन् । तर, तीमध्ये कुनै पनि पासवर्ड नमिलेपछि अब उनीसँग दुई पटकको मौका मात्रै बाँकी छ ।

फेसबुकका पूर्व सुरक्षा प्रमुख एलेक्स स्टामोसले थोमसलाई हार्ड ड्राइभ खोल्न मद्दत गर्ने तर त्यस बापत आफूलाई १० प्रतिशत चाहिने शर्त पनि राखेका छन् ।

यदि दुई पटकमा पनि पासवर्ड नमिलाए थोमसले सधैँका लागि बिटक्वाइन गुमाउने छन् । तर, यसरी बिटक्वाइन गुमाउने उनी पहिलो व्यक्ति भने हुने छैनन् । यसअघि नै करिब १४ करोड अमेरिकी डलर बराबरको बिटक्वाइन छोडिएर वा पासवर्ड बिर्सिएर कहिल्यै हासिल गर्न नसकिने अवस्थामा पुगिसकेको क्रिप्टोकरेन्सी डाटा कम्पनी चेनएनलाइसिसले बताएको छ ।