पलाता गाउँः जहाँ फोन गर्न एक घण्टा उकालो चढ्नुपर्छ

सुर्खेत । कालिकोटको पलाता गाउँपालिका सञ्चार सेवा तथा सुविधानबाट अझै टाढा छ । बस्तीमा मोबाइल नेटवर्क कमजोर भएका कारण पलाताका नागरिक फोन गर्नकै लागि डाँडा धाउने गरेका छन् ।

‘बिजुलीलगायत अन्य सुविधाको कुरा त परै छाडौं, गाउँमा टेलिफोन पनि राम्रोसँग लाग्दैन’, स्थानीय दिलबहादुर विश्वकर्माले गुनासो भने, ‘चुनावका बेला नेताले गाउँमै टेलिफोनको टावर बनाइदिने बनाइदिने भनेका थिए, तर अझै बनेको छैन ।

पलाताका धेरै युवा रोगजारीका लागि विदेश गएका छन् । ‘रोजगारीका लागि भारत गएका आफन्तसँग कुरा गर्नकै लागि डाँडाकाँडा धाउनु पर्ने स्थिति छ’ स्थानीय निरज विश्वकर्माले भने, ‘कुनै कुनै बस्तीबाट त मोबाइलमार्फत् कुरा गर्न लागि एक घण्टा उकालो हिँड्नु पर्छ ।’

स्थानीय सरकार बनेपछि त गाउँमै फोन गर्न सुविधान पाउने आश गरेको पलाताबासी अहिले निराश भएका छन् ।

पलाताको दुई नम्बरबाहेक अरु वडाका नागरिकको सास्ती उस्तै छ । स्थानीयले पटक–पटक गाउँपालिका अध्यक्षलाई टेलिफोनको टावर राख्ने प्रबन्ध मिलाउन आग्रह गरे । तर अझै उनीहरुको गुनासो सुनुवाइ हुन सकेको छैन ।

वडा नम्बर दुईका वडाध्यक्ष शक्ति भण्डारीले भने गाउँपालिका अध्यक्ष लक्ष्मण बमको कमजोरीका कारण समयमै टेलिफोनको टावर नबनेको बताए ।