नेकपा प्रचण्ड-माधव पक्षले माघ ९ गते काठमाडौंमा प्रदर्शन गर्ने

काठमाडौं । नेकपा कम्युनिष्‍ट पार्टी (प्रचण्ड-माधव पक्ष ) ले माघ ९ गते काठमाडौंमा विरोध प्रदर्शन गर्ने भएको छ ।

शनिबार पेरिसडाँडामा बसेको केन्द्रीय संघर्ष समितिको बैठकले प्रतिनिधि सभा विघटनविरुद्ध उपत्यकाको विभिन्‍न स्थानमा जुलुशसहित त्यस दिन १२ बजे रत्‍नपार्कमा प्रदर्शन गर्ने निर्णय गरेको हो ।

जनअधिकारको रक्षाका लागि उक्त प्रदर्शनमा सहभागितासहित ऐक्यबद्धता जाहेर गर्न सम्पूर्ण राजनीतिक दल, नागरिक समाज, संघसंस्थालगायतलाई बैठकले अपिल गरेको केन्द्रीय संघर्ष समितिका सह-संयोजक योगेश भट्टराईले जानकारी दिए ।

माघ ९ को विरोध प्रदर्शनको प्रचारप्रसारसँगै जनसहभागिता बढाउन भोलिदेखि प्रदेश, जिल्ला, निर्वाचन क्षेत्र, वडा तहसम्म विभिन्‍न बैठक र प्रचारात्मक कार्यक्रम राखिएको समिति सचिवालयका सदस्य प्रकाश विकल्पले बताए ।

केन्द्रीय संघर्ष समिति, उपत्यका संघर्ष समिति, वागमती प्रदेश कमिटी, सम्पर्क विशेष कमिटी तथा जनवर्गीय र पेशागत संगठनको संयुक्त विस्तारित सो बैठकमा अध्यक्ष प्रचण्ड र वरिष्ठ नेता झलनाथ जारी आन्दोलन लोकतन्त्र, जनअधिकार र संविधानको रक्षाका लागि भएकाले कुनै राजनीतिक दलको मात्र नभएर सिंगो मुलुकको लोकतन्त्रवादी शक्तिको संयुक्त जनआन्दोलन भएकाले अत्यन्तै उत्साह र सशक्त ढंगले तयारीमा जुट्न पार्टी पंक्तिलाई निर्देशन दिएको बैठकपछि निकालिएको विज्ञप्तिमा उल्लेख छ।