बालुवाटार जग्गा प्रकरण– अग्राधिकारको मुद्दा हेर्न नभ्याइनेमा

काठमाडौं । बालुवाटारस्थित ललिता निवास प्रकरणमा पूर्वप्रधानमन्त्री माधवकुमार नेपाललाई मुद्दा नचलाएको विषयमा सर्वोच्च अदालतमा दायर रिटउपरको सुनुवाई आज पनि हेर्न नभ्याइनेमा परेको छ ।

न्यायाधीशद्वय आनन्दमोहन भट्टराई र हरि फुयाँलको इजलासमा अग्राधिकार दिइएको सो रिटमाथिको सुनुवाइ हेर्न नभ्याइनेमा राखिएको हो ।

अधिवक्ता बालकृष्ण न्यौपानेले अख्तियार दुरुपयोग अनुसन्धान आयोग र महान्यायाधिवक्ताको कार्यालयलाई विपक्षी बनाइ २०७६ माघ २२ गते रिट दायर गरेका थिए । सर्वोच्चले उक्त रिटलाई अग्राधिकार दिएको थियो ।

अख्तियारले पूर्वउपप्रधानमन्त्री विजय गच्छदारसहित तीन पूर्वमन्त्री र अख्तियारकै एक पूर्वप्रमुख आयुक्तसहित १ सय ७५ जनाविरुद्ध २०७६ माघ २२ मा विशेष अदालतमा मुद्दा दायर गरेको थियो ।

तर, बालुवाटार जग्गा प्रकरणमा तत्कालीन प्रधानमन्त्री नेपालविरुद्ध मुद्दा दायर नगरिएको भन्दै न्यौपानेले रिट दर्ता गराएका थिए ।