नयाँ कोरोनाभाइरसले २०२१ सबैभन्दा कठिन हुनसक्छ : विश्व स्वास्थ्य संगठन

जेनेभा –नयाँ कोरोना भाइरसको फैलावटसँगै विश्व स्वास्थ्य संगठनले वर्ष २०२१ अघिल्लो वर्षभन्दा बढी कठिन हुने चेतावनी दिएको छ । नियमित मिडिया ब्रिफिङमा संगठनका प्रमुख डा. टेड्रोस आधानोमले नयाँ भाइरसले यो वर्ष कठिन हुने बताएका हुन् ।

उनका अनुसार बेलायत र ब्राजिलमा भेटिएको भनिएको नयाँ प्रजातिको कोरोना भाइरस सबै महादेशका ५० देशमा फैलिइसकेको उल्लेख गरे । नयाँ म्युटेन्ट भाइरसले विकसित खोपको प्रभावकारितालाई पनि चुनौति दिएको भन्दै उनले सरकार प्रमुखहरुलाई गम्भिर बन्न आग्रह गरे ।

नेपालको छिमेकी मुलुक भारतमा समेत नयाँ भाइरस फैलिइसकेको विश्वास गरिएको छ । एसियामा नयाँ भाइरस फैलने क्रम जापानमा तीव्र रहेको समेत संगठनले जनाएको छ । जापानमा अहिले आपतकाल लागु भैरहेको छ । नेपालले समेत नयाँ भाइरसको सम्भावित नमुना हङकङमा परिक्षणका लागि पठाएको थियो ।

शुक्रबारसम्म विश्वभर कोरोना भाइरसबाट मृत्यु हुनेको संख्या २० लाख नाघेको छ भने संक्रमित संख्या ९ करोड नाघेको छ । यसमा सबैभन्दा बढी प्रभावित अमेरिका, ब्राजिल र भारत छन् ।