नेपाललाई दिइने खोपबारे भारतले आज टुंगो लगाउने

नयाँ दिल्ली । नेपालसहित भुटान, बंगलादेश र ब्राजिललाई उपलब्ध गराइने कोभिड–१९ विरुद्धको खोपको मात्रा र समय तय गर्न आज भारतमा केन्द्रीय स्वास्थ्य समितिको बैठक बस्दैछ ।

नेपाली समय अनुसार मध्यान्ह सवा १२ बजे बस्ने बैठकले नेपाललाई दिइने खोपको मात्रा निधो गर्ने भारतीय संचारमाध्यमले जनाएका छन् । बैठकमा भारतीय स्वास्थ्य मन्त्री हर्षबर्धन, विदेशमन्त्री एस जयशंकर, भारत बायोटेक र सिरम इन्स्टिच्युटका प्रतिनिधि पनि सहभागि हुनेछन् ।

नेपालसहितका मुलुकलाई कहिले र कति मात्रामा खोप दिइने भन्ने कुरा बैठकमा टुंगो लगाइने भएको छ । भारतले शनिबारदेखि खोप लगाउन सुरु गरेको छ भने नेपालले आपतकालीन प्रयोगका लागि अक्सफोर्डले विकसित गरेको एस्ट्राजेनेका खोपलाई अनुमती दिएको छ ।

यसैसाता दिल्लीमा बसेको नेपाल–भारत संयुक्त आयोगको बैठकमा पनि भारतले खोप निर्यातका लागि छिमेकी मुलुक नेपाललाई उच्च प्राथमिकतामा राखेको जनाएको थियो ।