प्रचण्ड-माधवका कार्यालय सचिव भन्छन्- बालुवाटारको गेटमा पत्र बुझाएर फर्कियौं

काठमाडौं । नेपाल कम्युनिष्ट पार्टीको प्रचण्ड-माधव समूहले प्रधानमन्त्री केपी शर्मा ओलीलाई पार्टीबाट निष्कासन किन नगर्ने भन्दै मागेको स्पष्टीकरणको पत्र बालुवाटारको गेटमा बुझाएको छ ।

पेरिसडाँडा केन्द्रीय कार्यालयका सचिव तथा प्रचण्ड-माधव समूहका केन्द्रीय सदस्य श्रीराम ढकालका अनुसार नेताहरु सुरेन्द्र पाण्डे, मुकुन्द न्यौपाने र उनी गएर प्रधानमन्त्री निवासको ३ नम्बर गेटमा पत्र छाडेका हुन् ।

ढकालले नेपालप्रेससँग भने- स्पष्टीकरण माग्ने पत्र लिएर हामी तीनजना गएका हौं । भित्र प्रवेश गर्न नपाएपछि गेटमा सुरक्षाकर्मीलाई बुझाएर फर्कियौं । भित्र सुरक्षाकर्मीले सोधेरै पत्र बुझेका हुन् ।

पत्रमा ओलीलाई ‘साधारण सदस्यबाट समेत किन कारवाही नगर्ने ?’ भनेर सोधिएको उनले बताए । माधव नेपालले सोमवारै ओलीलाई पार्टीबाट निष्‍कासन गर्ने अन्तिम पत्र काटिएको बताएका थिए ।

यसैबीच प्रधानमन्त्रीको सचिवालयले भने ‘कथित पत्र’ लिएर कोही नआएको र बालुवाटारमा स्पष्टीकरणको पत्र बुझाइएको भन्ने दाबी हास्यास्पद रहेको जनाएको छ । प्रधानमन्त्रीका सञ्चारविज्ञ रामशरण बजगाईले त्यस्ता कुनै पत्र प्राप्त नभएको बताए ।