कपिलबस्तु जिल्ला ईन्चार्ज न्यौपाने ओली पक्षमा प्रवेश

रुपन्देही । नेपाल कम्युनिष्ट पार्टी नेकपाका केन्द्रीय सदस्य एवम् कपिलवस्तु इन्चार्ज गिरिधारीलाल न्यौपानेले प्रचण्ड–नेपाल पक्ष छाडेर ओली पक्षमा प्रवेश गरेपछि कपिलवस्तुमा नयाँ राजनीतिक तरंग आएको छ ।

साविक माओवादी केन्द्रको तर्फबाट नेकपाको केन्द्रीय नेतृत्वमा रहेका न्यौपाने पछिल्ला दिनहरुमा पार्टी २ समूहमा विभाजन भएसंगै प्रचण्ड–नेपाल समूहमा रहेर संगठन निर्माणमा लागेका थिए ।

तर न्यौपानेले प्रधानमन्त्री एवम् नेकपा अध्यक्ष केपी ओलीसंग बालुवाटारमा भेट गरेर आफू नेकपाको मूल नेतृत्वमा रहेको ओली समूहमा रहेको जानकारी दिएका छन् ।

नेकपाका स्थायी कमिटी सदस्य चक्रपाणि खनाल बलदेवका दाहिने हातका रुपमा परिचित न्यौपानेको कित्ता परिवर्तनले प्रचण्ड–नेपाल पक्षलाई कपिलवस्तुमा नराम्रो धक्का लागेको दावी ओली समूहको छ ।

यता नेकपाका केन्द्रीय सदस्य एवम् कपिलवस्तु अध्यक्ष झविलाल पोखरेलले गिरिधारीलाल न्यौपाने पार्टीको मूल घरमा फर्केपछि कपिलवस्तुका नेकपा कार्यकर्तालाई ऊर्जा प्रदान भएको बताए ।