महामारीको जटिलतालाई चिर्दै खेल क्षेत्र पूर्ववत् अवस्थामा फर्किनुपर्छ : खेलकुदमन्त्री

काठमाडौं । युवा तथा खेलकुद मन्त्री दावा तामाङले अखिल नेपाल फुटबल संघ (एन्फा) को १३औं साधारण सभाले देश-विदेशमा पर्वको रौनक सिर्जना गरोस् भन्ने कामना गरेका छन् ।

मंगलबार सानेपामा शुरू भएको एन्फाको १३औं साधारणसभालाई सम्बोधन गर्दै तामाङले फुटबलको क्षेत्रमा यो कार्यक्रमले हर्षको वातावरण पैदा गरेर खेलाडीमा खुशी ल्याउन सकोस् भनी कामना गरे ।

“यो साधारण सभाले गाउँदेखि ठाउँसम्म, देशदेखि विदेशसम्म फुटबलको क्षेत्रमा एउटा पर्वको माहोल बनाएर सकारात्मक तरङ्ग पैदा गर्न सफल होस्, ” उनले भने, “जुन तरङ्गले खेलाडीसँगै यो क्षेत्रलाई नै हर्षित बनाओस् ।”

कोरोना भाइरसको महामारीले सिर्जना भएको समस्या र जटिलतालाई खेलक्षेत्रले चिर्दै पूर्ववत् स्थानमा फर्किनुपर्ने बताए । “कोभिडले नेपाल मात्रै नभएर विश्वमा नै समस्या उत्पन्न भएको छ, अब त्यो समस्या र जटिलतालाई खेल क्षेत्रबाट चिर्दै पूर्ववत् स्थानमा पुगेर अझ अगाडि बढ्नुपर्छ ।”

कोरोना भाइरस संक्रमको जोखिमकै कारण लामो समयदेखि रोकिएको खेलकुद पुरस्कार र खेलाडी प्रोत्साहन भत्ता पनि छिट्टै उपलब्ध गराउनका लागि पहल भएको उनले बताए ।