प्रचण्ड-माधव पक्षका सांसदहरूको बैठक : अविश्‍वास प्रस्तावमा हस्ताक्षर गरेका ४ जना अनुपस्थित

विराटनगर । नेकपा प्रचण्ड-माधव पक्षका सांसदहरूको बैठक शुरू भएको छ । होटल एसियाटिकमा जारी बैठकमा ३३ सांसद उपस्थित छन् । प्रचण्ड-माधव पक्षका दलका नेता भीम आचार्यको अध्यक्षमा बसेको बैठकमा नेकपाका नेताहरू प्रदेशका सचिव हिमाल राई , प्रदेश कार्यलय सचिव टंक गिरी र सह-ईन्चार्ज सावित्री काफ्ले सहभागी छन् । बैठकमा नेकपा संसदीय दलका उपनेता टंक आङबो अनुपस्थित छन् ।

समूहमा रहेको भनिएका आङबोसहित सांसद तुलसीप्रसाद न्यौपाने, टंक आङबो, गुलेफुन मिँया अनुपस्थित छन् । प्रस्तावमा हस्ताक्षर नगरेका राजन राई र बलबहादुर साम्सुहाङ भने सहभागी छन्।

प्रचण्ड-माधव समूहका ३७ संसदले मुख्यमन्त्री शेरधन राईविरुद्धको अविश्‍वास प्रस्ताव प्रदेश सभामा दर्ता गराएका छन् । प्रस्तावमा हस्ताक्षरकर्तामध्ये ५ सांसदले मुख्यमन्त्री राईलाई सघाउने भन्दै प्रचण्ड माधव समूहको क्याम्प परिवर्तन गरिसकेका छन् ।

प्रदेश सभाको हिउँदे अधिवेशन बुधबारबाट शुरु हुँदैछ । प्रदेशसभामा अविश्वास प्रस्ताव निर्णयार्थ प्रस्तुत हुनेछ । प्रदेश १ का मुख्यमन्त्री शेरधन राईले सरकारलाई कुनै पनि हालतमा विघटन हुन नदिने दाबी गर्दै आएका छन् ।