प्रचण्ड–माधव पक्षलाई संसदीय गतिविधि गर्न नदिने ओली पक्षीय संसदीय दलको निर्णय

सुनसरी । प्रदेश १ को ओली पक्षीय नेकपाको संसदीय दलको बैठकले प्रचण्ड–माधव पक्षका सांसदलाई संसदीय गतिविधिमा संलग्न हुन नदिने निर्णय गरेको छ । ओली पक्षले प्रचण्ड–माधव पक्षका १६ सांसदलाई संसदीय गतिविधि गर्न नदिने निर्णय गरेको हो ।

आफ्नो पक्षले कारबाही गरेका सांसदलाई प्रदेशसभा बैठकमा प्रवेश नदिन ओली पक्षका सांसद सभामुखसमक्ष डेलिगेशन लिएर जाँदैछन् ।

उक्त पक्षका प्रमुख सचेतक बुद्धीकुमार भण्डारीले भने– कारबाही गरिएका सांसदले कुनै पनि हालतमा प्रदेशसभा बैठकमा प्रवेश पाउनु हुन्न । यो हाम्रो सभामुखलाई आग्रह छ ।

प्रचण्ड–माधव पक्षले भने आजदेखि सुरु हुने प्रदेशसभा बैठकमा मुख्यमन्त्री शेरधन राईलाई दलको नेताका हैसियतमा बोल्न नदिने निर्णय गरेको छ ।

यसले आज हुने प्रदेशसभा बैठक तनावपूर्ण हुने संकेत दिएको छ ।