संवैधानिक इजलासको नियम- आधा घण्टाभित्र बहस सक्नैपर्ने

काठमाडौं । प्रतिनिधिसभा विघटनविरुद्धको मुद्दा सुनुवाइ चलिरहँदा संवैधानिक इजलासमा एउटै कानुन व्यवसायीले घण्टौं समय लिएर बहस गर्न थालेपछि आजदेखि समय निर्धारण भएको छ ।

संवैधानिक इजलासमा सुनुवाइ शुरु भएलगत्तै प्रधानन्यायाधीश चोलेन्द्र शमसेर जबराले बहस गर्दा ३० मिनेट समयभित्र टुंग्याउन निर्देशन दिएका छन् । यही निर्देशन अब आदेशका रुपमा रहनेछ ।

मंगलबारदेखि नै बहस गरिरहेका चन्द्रकान्त ज्ञवालीलाई आधा घण्टाभित्र बहस सक्न भनिएको थियो । अब संवैधानिक इजलासमा बहस गर्ने पक्ष विपक्षका वकिलले आधा घण्टामा सक्नुपर्ने भएको छ ।

बहसमा भाग लिन सयौं वकिलले नाम लेखाएका छन् । यदि समय निर्धारण नगर्ने हो भने महिनौसम्म सुनुवाइ लम्बिने देखिएकाले समय निर्धारण गरिएको हो । मुद्दालाई चाँडो टुंगो लगाउन सातामा दुई दिनमात्र बस्ने संवैधानिक इजलास दिनहुँ बसिरहेको छ ।

प्रधान न्यायाधीश अध्यक्षताको इजलासमा न्यायाधीशहरु विश्वम्भर श्रेष्ठ,अनिल सिन्हा,सपना प्रधान मल्ल र तेजबहादुर केसी छन् ।