बीमा समितिले अझै पाएन अध्यक्ष, को-को छन् प्रतिस्पर्धामा ?

काठमाडौं । बीमा समिति नेतृत्‍वविहीन भएको एक महिना वित्न लाग्यो । अझै अध्यक्षको टुंगो लागेको छैन । समितिका अध्यक्ष चिरञ्जीवि चापागाईं कार्यकाल पूरा गरी गत पुस १३ गते पदमुक्त भएका थिए ।

बीमा क्षेत्रको नियामक निकाय बीमा समिति नेतृत्वविहीन भएपछि बीमा कम्पनीहरूले बीमा समितिबाट लिनुपर्ने स्वीकृतिलगायतका काम रोकिएका छन् ।

समितिको नयाँ अध्यक्षका लागि अहिले आधा दर्जनभन्दा बढी व्यक्ति दौडधुप गरिरहेका छन् । समितिको अध्यक्ष पदका लागि खुलैरै नेपाल राष्ट्र बैंकका डेपुटी गभर्नर चिन्तामणी शिवाकोटी, कृषि विकास बैंकका अध्यक्ष लक्ष्मीप्रपन्न निरौला, राष्ट्र बैंकका निर्देशक रामशरण खरेल, राष्ट्र बैंकका पूर्वनिर्देशक कल्याणबन्धु अर्याल, नेपाल पुनर्बीमा कम्पनीका निवर्तमान अध्यक्ष महेश गुरागाईं, आइक्यानका पूर्वअध्यक्ष कृष्ण आचार्यलगायत प्रतिस्पर्धामा रहेका छन् ।

पूर्वअध्यक्ष चापागाईंले पुनः दोहोरिने इच्छा व्यक्त गरेका थिए । उनी प्रचण्डनिकट हुन् । समितिको अध्यक्ष पदका लागि अर्थमन्त्रीले सीधै मन्त्रिपरिषद्‍मा प्रस्ताव लगेर बीमा समितिको अध्यक्ष नियुक्त गर्न सक्ने व्यवस्था छ ।

यसअघि पनि बीमा समितिको अध्यक्षमा सरकारले धेरै जसो बैंकिङ क्षेत्रमा काम गरेका व्याक्तिलाई नियुक्त गर्दै आएको छ । स्रोतका अनुसार अर्थमन्त्रालयले आकांक्षीबाहिरकालाई नयाँ अध्यक्ष बनाउने सम्भावना धेरै छ ।
अर्थमन्त्रीको सिफारिसमा मन्त्रिपरिषदले नियुक्त गर्ने बीमा समिति अध्यक्षको कार्यकाल ४ वर्षको रहेको छ ।