सुनिल धमलाको शतकमा पुलिसले लुम्बिनीलाई दियो ३११ रनको लक्ष्य

काठमाडौं । ओपनर सुनिल धमलाको शतकप्रेरित नेपाल पुलिस क्लबले प्रधानमन्त्री कप राष्ट्रिय पुरुष क्रिकेट प्रतियोगितामा लुम्बिनी प्रदेशलाई ३११ रनको विजय लक्ष्य दिएको छ ।

त्रिवि क्रिकेट मैदानमा लुम्बिनीले टस जितेर फिल्डिङ रोजेपछि क्रिजमा उत्रिएको पुलिसले निर्धारित ५० ओभरमा ४ विकेट गुमाएर ३१० रनको विशाल योगफल तयार गरेको हो ।

पुलिसका लागि १४५ बलको सामना गरेका धमलाले ७ चौका र १ छक्कासहित १०४ रन बनाए । त्यस्तै, दिपेन्द्रसिंह ऐरीले ६१ बलमा १ चौका र ६ छक्कासहित ८५ रन बनाए । आक्रामक ब्याटिङ गरेका पवन सर्राफले १३ बलामा १ चौका र ६ छक्कासहित अविजित ५० रन बनाए । आरिफ शेखले १४ बलमा अविजित २९ रन जोड्दा अमित श्रेष्ठले २८ रन बनाएका थिए ।

पुलिसको सम्हालिएको ब्याटिङसामु संघर्षरत लुम्बिनीका लागि कप्तान कृष्ण कार्की, अनिल खरेल, दिपेन्द्र रावत र सौरभ खनालले १/१ विकेट लिए ।

पहिलो खेलमा बाग्मतीसँग ७ विकेटले पराजित भएको पुलिसले दोस्रो खेलमा सुदूरपश्चिम प्रदेशलाई ९ विकेटले हराएको थियो । त्यस्तै, पहिलो खेमला प्रदेश २ लाई ७७ रनले हराएको लुम्बिनीको यो दोस्रो खेल हो ।