एपीएफको लगातार दोस्रो जित, गण्डकी उपाधि होडबाहिर

काठमाडौं । आशिफ शेखको अर्धशतक प्रेरित एपीएफ क्लबले प्रधानमन्त्री कप राष्ट्रिय पुरुष क्रिकेट प्रतियोगितामा गण्डकी प्रदेशलाई ६ विकेटले पराजित गरको छ ।

मूलपानी क्रिकेट मैदानमा १०७ रनको विजय लक्ष्यसहित जवाफी ब्याटिङमा उत्रिएको एपीएफले १७.३ ओभरमा चार विकेट गुमाएर भेट्टायो । एपिएफका लागि आक्रमक ब्याटिङ गरेका आशिफले ५६ बलमा ५ चौका र ६ छक्कासहित ७८ रनको महत्त्पूर्ण योगदान गरे ।

त्यस्तै, सुमित महर्जन १८ रन बनाएर पेभेलियन फर्किँदा कप्तान शरद भेसावकर ५ र भुवन कार्की १ रनमा अविजित रहे । त्यसअघि ओपनर सुवाष खकुरेल र रित गौतम शून्यमा आउट भएका थिए ।

गण्डकीका लागि चन्द्र पौडेल र विशाल पौडेलले २/२ विकेट लिए । टस हारेर पहिले ब्याटिङको निम्तो पाएको गण्डकीले ४६ ओभरमा सबै विकेट गुमाएर १०६ रनको योगफल तयार गरेको थियो । गण्डकीका लागि ओपनर समीर कँडेलले ११४ बल खेलेर दुई चौकासहित सर्वाधिक ३६ रन बनाउनु बाहेक अन्य खेलाडीले २० को आँकडा पार गर्न सकेनन् । अर्का ओपनर अर्जुन कुमाल शून्यमा आउट हुँदा विष्णु पाण्डे र दीपेश खत्रीले १५/१५ रनको योगदान गरे ।

एपीएफको कसिलो बलिङसामु टिक्न नसकेका गण्डकीका अन्य ब्याट्सम्यानले उल्लेख्य प्रदर्शन गर्न सकेनन् ।

एपीएफका लागि १० ओभरमा मात्र ११ रन खर्चेका कमल ऐरीले ३ मेडनसहित सर्वाधिक चार विकेट लिएका थिए । अविनाश बोहरा र कप्तान शरदले २र२ विकेट लिँदा किशोर महतोको खातामा एक विकेट रह्यो ।

जितसँगै एपिएफले दुई खेलबाट चार अंक जोडेको छ भने चार खेलमा एक मात्र जित निकालेको गण्डकी उपाधि होडबाट बाहिरिएको छ ।