सुर्खेतबाट माधव नेपालको घोषणा– ओलीलाई आजै साधारण सदस्यबाट हटाउँछौं

सुर्खेत । विभाजित नेकपाका अध्यक्ष माधवकुमार नेपालले प्रधानमन्त्री तथा साबिक नेकपाका अध्यक्ष केपी शर्मा ओलीलाई आजकै मितिबाट साधारण सदस्यताबाट निष्कासनको घोषणा गरेका छन् ।

सुर्खेतको वीरेन्द्रनगरमा बिहीबारआयोजित आमसभालाई सम्बोधन गर्दै नेपालले ओलीलाई आजै कम्युनिष्ट पार्टीको साधारण सदस्यसमेत नरहने गरी निष्कासन गर्ने तयारी भइरहेको बताए ।

नेपालले भने– आज पार्टीबाट हटाउने अन्तिम चरणमा छौं । आजकै मितिबाट साधारण सदस्यबाट निष्कासन गर्न गइरहेका छौं । हामीले तीन दिनको स्पष्टीकरण मागेका थियौं तर चार दिनसम्म स्पष्टीकरण दिएनन् । उनले स्पष्टीकरण दिने हिम्मत पनि राख्दैनन् ।

बालुवाटारमा लगेर सुरेन्द्र पाण्डे र श्रीराम ढकालले स्पष्टीकरणको पत्र बुझाएको तर ओलीले जवाफ दिने आँट नभएको दावी नेपालले गरे । उनले आजै चिठी लेखेर ओलीलाई साधारण सदस्यबाट निष्कासन गर्ने बताए ।