लुम्बिनी चीनी मिललाई स्थानीयको चेतावनीः प्रदूषण नहुने गरी मात्रै उद्योग चलाऊ, नत्र आन्दोलन गर्छौ

रुपन्देही । पश्चिम नवलपरासीको सुनवलस्थित लुम्बिनी चिनी मिल पुनः संचालनमा आउने भएपछि स्थानीयले प्रदूषण नियन्त्रण गर्नुपर्ने लगाएतका विभिन्न माग राख्दै जिल्ला प्रशासन कार्यालयनमा ज्ञापनपत्र बुझाएका छन् ।

विगतमा चिनी मिलका कारण बढेको प्रदूषणले आक्रान्त स्थानीयले प्रदूषण नियन्त्रणका लागि दवाव दिन संघर्ष समिति नै बनाएका स्थानीयले प्रशासनलाई ज्ञापनपत्र बुझाएका हुन् ।

चिनि मिलले वातावरणीय र सामाजिक दायित्व पूूरा नगरी पुनः उद्योग संचालनको तयारी गरेको भन्दै जिल्ला प्रशासन कार्यालय पश्चिम नवलपरासीका प्रमुख सागरमणि पाठकलाई ज्ञापन पत्र बुुझाएको हो ।

२०६३ सालमा लुम्बिनी चिनी मिल र तत्कालीन सात राजनितिक दल र स्थानीय सरोकारवालाबीच भएको समझदारीको वास्ता नगरी पुनः संचालन गरेकोप्रति गम्भीर ध्यनाकार्षण भएको संघर्ष समितिले जनाएको छ ।

संघर्ष समितिका अनुसार चिनी मिलले प्रदूषण नियन्त्रण नगरेको, चिनी मिलबाट प्रत्यक्ष असर पर्ने क्षेत्रहरुमा समाजिक दायित्व पूरा नगरेको र किसानको भुक्तानी गर्नुपर्ने रकम भुत्तानी नगरेको भन्दै संघर्षका कार्यक्रमअन्तरगत ज्ञापनपत्र बुझाएको हो ।

संघर्ष समितिका संयोजक कृष्ण के.सीले उद्योगको मापदण्ड पूरा गरेर वातावरणीय प्रदूषण नियन्त्रणका उपाय अवलम्वन र उखु कृषकहरुको रकमसमेत भुत्तानी गर्ने सुनिश्चतता हुनुपर्ने माग रहेको बताए ।

यथास्थितिमा चिनी मिल सञ्चालन गरे संघर्षका जुनसुकै कार्यक्रमहरु संचालन गर्ने संघर्षसमितिका सचिव जिवन पौडेलले बताए । यता लुम्बिनी चिनी मिलले भने नयाँ व्यवस्थापनका साथ प्रदूषण नियन्त्रणमा संवेदनशील भएरै उद्योग संचालनको तयारी गरेको जनाएको छ ।