प्रधानमन्त्रीले भने– म पनि अपांग नै हुँ, अर्काको किड्नीको बैसाखी टेकेर हिंडेको छु

काठमाडौं । प्रधानमन्त्री केपी शर्मा ओलीले आफू पनि ‘अपांग’ भएको भन्दै अपांगता भएका व्यक्तिहरुलाई हरेस नखान आग्रह गरेका छन् । दुवै मिर्गौला फेरेर पनि अझै देश र जनताका लागि केही गर्न लागिपरेको भन्दै प्रधानमन्त्री ओलीले भने– म अर्काको मिर्गौलाको बैसाखी टेकेर हिंडिरहेको छु । एक हिसाबमा म पनि अपांग नै हुँ । शारीरिक रुपमा अपांग हुँदैमा हरेस खानुहुँदैन ।

आइतबार काठमाडौंमा अपांगता भएका व्यक्तिहरुसँगको अन्तरक्रियामा उनले शारीरिक रुपमा भएको अशक्तता भन्दा मानसिक दरिद्रता खतरनाक हुने बताए । ‘कोही-कोही सबलांग छु भन्नेहरु देशको हितविपरीत लागेका छन् । शारीरिक रुपमा हुने कमजोरी भन्दा मानसिक दरिद्रता ज्यादै खतरनाक हुन्छ’ उनले भने । उनले साहित्यकार तथा लेखक झमक घिमिरेको उदाहरण दिंदै अपांगता भए पनि चेतनाले धेरै काम गर्न सकिने बताए । घिमिरेबाट सबैले प्रेरणा लिन सक्नुपर्ने उनको भनाइ थियो ।

प्रधानमन्त्री ओलीले शारीरिक रुपमा अशक्त, सहाराविहीनहरुका लागि सरकार अभिभावक भएको बताए । ‘अब कोही सडक बालबालिका हुने छैनन्, कसैले सडकमा मागेर खानु पर्दैन’ उनले भने, ‘सहाराविहीनका लागि सरकार छ ।’