अष्ट्रेलियाले फाइजर खोपलाई दियो अनुमति, ५० लाख जनसंख्यालाई लगाइने

काठमाडौं । अष्ट्रेलियाले फाइजर खोपलाई औपचारिक प्रयोगका लागि अनुमति दिएको छ । प्रधानमन्त्री स्कट मरिसनले सोमबार यस्तो घोषणा गरेका हुन् ।

फेब्रुअरीको अन्त्यदेखि खोप लगाउन सुरु गरिने भएको छ । आयोजित पत्रकार सम्मेलनमा प्रधानमन्त्री मरिसनले विस्तृत अध्ययनपछि मात्र फाइजर खोपलाई अनुमति दिइएको बताए ।

अष्ट्रेलियाको थेराप्युटिक गुड्स एड्मिनिस्ट्रेसनले खोप प्रयोगका लागि अनुमति दिएको हो । अस्थायी र आकस्मिक नभइकन पूर्ण रुपमा खोप प्रयोगका लागि फाइजरलाई अनुमति दिइएको उनले बताए ।

अष्ट्रेलियाले यसअघि नै फाइजरसँग एक करोड डोजका लागि सम्झौता गरिसकेको छ । ५० लाख मानिसले अष्ट्रेलियामा खोप लगाउनेछन् । पहिलो चरणमा स्वास्थ्यकर्मी र वृद्धवृद्धाले खोप लगाउनेछन् ।