भारतले आज ७२ औं गणतन्त्र दिवस मनाउँदै

एजेन्सी । छिमेकी मुलुक भारतले आज आफ्नो ७२ औं गणतन्त्र दिवस मनाउँदैछ ।

सन् १९५० जनवरी २६ मा संविधान जारी भएसँगै संघीय गणतन्त्रात्मक मुलुक बनेसँगै भारतले गणतन्त्र दिवस मनाउन थालेको हो । भारत सन् १९४७ अगष्ट १५ मा बेलायती उपनिवेशबाट मुक्त भएको थियो ।

गणतन्त्र दिवसको अवसरमा दिल्लीको राजपथमा औपचारिक कार्यक्रमको आयोजना गरिएको छ । कार्यक्रममा राष्ट्रपति रामनाथ कोविन्द, प्रधानमन्त्री नरेन्द्र मोदी लगायतको उपस्थिति हुनेछ ।

यसअघि आज बिहान प्रधानमन्त्री मोदीले युद्धका क्रममा मारिएका सैनिक जवानलाई श्रद्धान्जलि अर्पण गर्न नेशनल वार म्युजियम पुगेका थिए ।

राजपथमा हुने कार्यक्रममा भारतले आफ्नो शक्ति प्रदर्शन गर्नेछ । त्यस्तै देशका अलग–अलग क्षेत्रको संस्कृतिको झलक पनि देखाइनेछ ।

गणतन्त्र दिवसको उपलक्ष्यमा नेपालस्थित भारतीय राजदूताबासले भने कुनै पनि औपचारिक कार्यक्रम आयोजना नगर्ने यसअघि नै बताइसकेको छ । कोरोना भाइरसको महामारीका कारण २५ भन्दा बढी व्यक्ति एकै ठाउँ भेला हुन नपाउने सरकारी मापदण्डका कारण यस वर्ष औपचारिक कार्यक्रम हुन नसकेको दूताबासले प्रष्ट पारेको छ ।